KHABAT media - سازمانی خەبات سەرەخۆشی بە خانەوادەی خان سادق وەزیری رادەگەێنێ‌


سازمانی خەبات سەرەخۆشی بە خانەوادەی خان سادق وەزیری رادەگەێنێ‌
تاریخ : Thursday, April 12 @ 16:37:36 UTC
بابه‌ت : به‌ڵگه‌نامه‌کان


خەباتمێدیا: بەبۆنەی كۆچی دوایی سارم خان سادق وەزیرى، یەكێك لە تێكۆشەرانی دێرین و دیاری گەلەكەمان لە وەڵاتی سوئیس، سازمانی خەبات پرسەو سەرەخۆشی لە خانەوادەی سارم خانی سادق وەزیری دەكات.

ڕۆژی چوارشەممە 22ی خاکەلێوەی 1397ی كۆچی خۆری، "سارم خان سادق‌ وەزیری" پارێزەر و مافناس و یەكێك لە تێكۆشەرانی دێرینی کورد، لە تەمەنی ٩٧ ساڵیدا، لە وڵاتی سویس کۆچی دوایی کرد.



سارم خان سادق‌ وەزیری، لە 12ی جۆزەردانی ساڵی 1300ی كۆچی خۆری، لە شاری سنە لەدایک بووە، خوێندنی سەرەتایی‌ لەم شارە و دواناوەندی لە سنە و تەورێز تەواو کرد و دوای ساڵێک توانی لە بەشی یاسا لە زانکۆ درێژە بە خوێندن بدات و سەرئەنجام لە دەزگای قەزایی ئەوکاتی ئێراندا کاری پێ دەسپێردرێت.

ناوبراو دوای کوده تای 28ی گەڵاوێژی 1332، بەهۆی چالاكی سیاسی دەگیرێ‌ ‌و ڕەوانەی بەندیخانەی "فلک الفلاک"ـی لوڕستان دەکرێ. دوای چواردە مانگ زیندان بە ئێعدام مەحکووم دەکرێت و پاش چوار ساڵ حوکمەکەی دەبەخشرێت ‌و ئازاد دەکرێ.

ساڵی 1357 سارم خان سادق‌ وەزیری لەگەڵ چەند کوردێکی دانیشتووی تاران  "جمعیت کردهای مرکز"یان دامەزراند و ناوبراو وەک وتەبێژی "جمعیت"ـەکە ناسرابوو.

هەروەها لە داڕشتنی گەڵاڵەی خودموختاری پێشنیارکراوی دەستەی نوێنەرایەتیی کورد بۆ وتووێژ لەگەڵ دەسەڵاتدارانی تازەی ئێران لە ساڵی  1358 ڕۆڵێکی کاریگەر و سەرەکی وەک یاساناس گێڕا.

بەبۆنەی كۆچی دوایی سارم خان سادق وەزیری، بەناوی كاك بابەشێخی حوسێنی سكرتێری گشتی سازمانی خەبات و دەفتەری  سیاسی و تێكرای ئورگانەكانی سازمانەوە پرسە و سەرەخۆشی لە خانەوادە و كەس و كاری كۆچكردوو دەكەین و كۆچی دوایی ئەو تێكۆشەرەی گەلەكەمان بە خەسارەتێكی گەورە بە بزوتنەوەی ئازادیخوازی كورد لە كوردستانی ئێران دەزانین.







سه‌رچاوه‌ی ئه‌م بابه‌ته‌ : KHABAT media


لینکی ئه‌م بابه‌ته‌ :
/modules.php?name=News&file=article&sid=9884