KHABAT media - بەشێك لە پێشێلكاریەكانی رژیم بەرامبەر هاووڵاتیانی كوردستان لە ساڵی 1396


بەشێك لە پێشێلكاریەكانی رژیم بەرامبەر هاووڵاتیانی كوردستان لە ساڵی 1396
تاریخ : Saturday, March 24 @ 17:58:59 UTC
بابه‌ت : کوردستانی


خەباتمێدیا: لە یەكساڵی رابردوودا هێزەكانی رژیم لە كوردستان كۆمەڵێك پێشێكاری مافی مرۆڤیان ئەنجام داوە كە لە چاو ساڵانی پێشتر بەرێژەیەكی بەرچاو ئەو پێشێلكاریانە زیادیان كردووە.
 لە ساڵی 1396ی هەتاوی دا، ٢١٩ کۆڵبەر و کاسبکاری کورد بە تەقەی ڕاستەوخۆی هێزە سەركوتگەرەكانی رژیم یان بەربوونەوە بوونە قوربانی.
هەواڵدەری هەنگاو لەو بارەوە دەنووسێ: ڕێژەی پێشێلكاریەكان و بوونە قوربانی كۆڵبەران لەچاو ساڵی پێشتر کە ١٤٣ حاڵەت بووە، ٧٦  حاڵەت واتە زیاتر لە ٥٣% هەڵکشانی بە خۆوە بینیوە.



ئەو هەواڵدەریە دەنووسێ لەکۆی ٢١٩ قوربانیی ئەمساڵدا، ٧١ کەس گیانیان لەدەست داوە.
 لەو ٧١ کەسە، ٥٥ کۆڵبەر لە ناوچە سنوورییەکان و ١٦ کاسبکاری کورد لە جاددەکانی کوردستان و ئێران گیانیان لە دەست داوە.
ئاماری کوژراوەکان لە ئەمساڵدا، بە بەراورد لەگەڵ ساڵی 1395کە ٦٦ کەس بوون، ٧.٥% هەڵکشاوە.
بە جیاکاریی پارێزگاکانی کوردستان، پارێزگای ئورمیە بە ٤٩ کوژراو ، زۆرترین کوژراوی بووە و پارێزگای سنە ١٩ کەس و پارێزگای کرماشان ٣ کوژراویان لە ساڵی 1396تێدا تۆمار کراوە.
 لە کۆی ٢١٩ قوربانی لە ساڵی 1396، ١٤٨ کۆڵبەر و کاسبکاری کورد بریندار بوون.
ئەم ڕێژەیە بە بەراورد لەگەڵ ٧٧ کەسی ساڵی ڕابردوودا، ٩٢% هەڵکشاوە.
لەو ساڵەدا، ٧٩ کۆڵبەر و کاسبکاری کورد بە تەقەی ڕاستەوخۆی هێزە سەركوتگەرەكانی رژیمی ئێران، ٣١ کەس بەهۆی پێکدادانی ماشێن، ١٩ کۆڵبەر و کاسبکار بەهۆی ڕاوەدوونانی هێزەکانی حکوومەت و کەوتنەخوارەوە لە چیا و بەرزاییەکان، ١٢ کەس بەهۆی تەقینەوەی مین و ٢ کەس بەهۆی ڕنووی بەفر و سەرمابردووییەوە بریندار بوون.
هەروەها  سێ کۆڵبەریش بە هۆی فڕێدانی بەرد لەلایەن هێزەکانی حکوومەتەوە، کەوتنە ژێر کۆڵ و گازگرتوویی برینداربوون.
لە کۆی ئەو ١٤٨ کۆڵبەر و کاسبکارەی کورد کە بریندار بوون، ٧٢ کەسیان خەڵکی پارێزگای سنە، ٦٦ کەسیان خەڵکی پارێزگای ئورمیە و ١٠ کەسیشیان خەڵکی  پارێزگای کرماشان بوون.
هەروەها لەو ساڵەدا ناوەندە ئەمنییەکانی رژیمی ئێران لە ساڵی ٩٦ی هەتاویدا، ٢ هەزار هاووڵاتیی کوردیان دەستبەسەر کردووە کە تەنیا ناوی ٦٩٨ کەسیان ئاشكرا بووە.
لە دوای پەلاكارەكان بۆ سەر بۆ سەر بینای  مەجلیسی رژیم لە تاران، ڕێفراندۆمی کوردستانی عێراق، ناڕەزایەتیی جەماوەری بە کوشتنی کۆڵبەران و سەرهەڵدانی جەماوەریی ئەم زستانە، ئەو هۆیانە بوون کە سەدان هاووڵاتیی کورد لەلایەن هێزە سەركوتگەرەكانی رژیمی ئێرانەوە دەستبەسەر کران، کە ناوی زیاتر لە ١٣٠٠ کەسیان تا ئێستا ئاشكرا نەبووە.
 لەو ٦٩٨ کەسەی کە ناویان ئاشكرا بووە، ٤٧٠ کەس بە تۆمەتی سیاسی، ١٠٥ کەس چالاکیی مەدەنی، ٩٢ کەس چالاکیی بە تۆمەتی چالاکی مەزهەبی، ٢٢ کۆڵبەر و کاسبکار و هەروەها ٦ چالاکیی كرێکاریی دەستبەسەر کراون.
لەو رێژەیە، ٤١ ژن، ٣٢ چالاکیی خوێندکاری و ٣٠ چالاکیی ڕۆژنامەنووسی یان سووسیال مێدیا بوون.






سه‌رچاوه‌ی ئه‌م بابه‌ته‌ : KHABAT media


لینکی ئه‌م بابه‌ته‌ :
/modules.php?name=News&file=article&sid=9797