KHABAT media - راپەڕینی خەڵکی ئێران، هۆکار و ئاکام


راپەڕینی خەڵکی ئێران، هۆکار و ئاکام
تاریخ : Tuesday, January 02 @ 17:39:11 UTC
بابه‌ت : وتار


فرمێسك ئەردەڵان
لە دوای نزیك بە چوار دەیە سەركوت و گەندەڵی و دزی و بڕیارەکانی رۆحانی کە پێچەوانەی بەڵێنەكانی بوو، خەڵک تاقەتیان نەماوە و هەموو ئەو زوڵمو ستەمەی لە دوای هاتنە سەركاری دەسەڵاتی ئاخوندان تا ئێستا لێیان کراوە، بۆتە هۆی سەرهەڵدانی بێزاری و توورەیی خەڵك، هاتوونەتە سەرشەقامەکان و هەموو چین و توێژەكانی ئێران بوێرانە داوای مافی خۆیان دەکەن.
سەرەتای ئەم راپەڕینە لە ٦ی بەفرانبار 1396 لە شاری  مەشهەد دەستی پێ کردوە و شارەکانی دیکە بە ئەرکی خۆیان زانیوە کە بێنە سەرشەقام و دژ بە دیكتاتۆریەت و گەندەڵی نارەزایەتی دەرببرن.


 جیاوازی ئەم راپەرین و نارەزایەتیانە ئەوەیە كە: یەکەم لە دروشمەکاندا راستەوخۆ ئاخوند خامنەیی رێبەری رژیمی ئێران دەكەنە ئامانج، دوهەم ئەوەی کە ئەم نارەزایەتیانە بەشێوەیەكی یەكگرتوو لەلایەن تێكڕای چین و تووێژەكانی كۆمەڵگەی ئێرانەوە دەستی پێكردووە، ئەویش لە كاتێكدا زۆربەی هەرە زۆری كۆمەڵگەی ئێران بەدەست برسیەتی و هەژاری كە ئاكامی سیاسەتی رژیمە دەستی پێ كرد.
لەسەرەتای ئەم راپەرینەدا رژیم پێی وابوو وەکو نارەزایەتیەكانی پێشوو دەتوانێ‌ سەركوتی خەڵك بكات، بەڵام لەدوای  ئەوەی لانی کەم لە ۲۱پارێزگای ئێران جەماوەر راپەریون و وێنە و هێماكانی سەرانی دەسەڵاتیان هێنایە خوارەوە و ئاگریان تێبەردان و چاونەترسانە لەبەرامبەر هێزە سەركوتگەرەكاندا وێستانەوە، هەست بە مەترسی دەکات، جوێ لە كوشتن و گرتنی جەماوەر، هەموو رێگەیەكی دیكەی وەك راگرتنی تلگرام و ئێنستاگرام لە ناوخۆی ئێران بۆ راگرتنی ئەو نارەزایەتیانەی گرتووەتەبەر.
ئەوەی جێگەی باس و تێرامانە هەڵوێستی رۆژئاوا لە بەرانبەر ئەو راپەڕینانەیە كە بە پێچەوانەی نارەزایەتیەكانی پێشوو، ئەوجار هەر زوو  دۆناڵد ترامپ سەرۆک کۆماری ئامریکا لە توویتێكیدا گوتویەتی كە خەڵکی ئێران تەحەمولی ئەو بارودۆخەیان نەماوەو نایانهەوێ سەرمایەی ئەو وڵاتە بۆ گرووپە ترۆریستیەکان بە فیرو بروات. بە وتەی بەرپرسانی رۆژئاوا ئەم راپەڕینە لە ساڵی ٨٨بەهێزترە و ئەم جارە خەڵک رۆڵی گرینگیان هەبووە. شیرین عیبادی: نارەزایەتی ئەم ماوەیە سەرەتایێکە بۆ دەستپێکی قۆناغێكی نوێ.
شیمانەی ئەوە دەكرێ لە داهاتوویەكی نزیكدا راپەرینە جەماوەریەكەی ئەو جارە هەموو شار و ناوچەیەكی ئێران بگرێتەوەو نیزامی دیكتاتۆری ئاخوندی بچێتە ریزی دەسەڵاتە دیكتاتۆرە لە كار لادراوەكان و خەڵكی ئێران بە ئازادی و مافە بنچینەییەكانی خۆیان بگەن و كۆتایی بە ستەم و بێ عەداڵەتی لەو وەلاتە بێ.






سه‌رچاوه‌ی ئه‌م بابه‌ته‌ : KHABAT media


لینکی ئه‌م بابه‌ته‌ :
/modules.php?name=News&file=article&sid=9480