KHABAT media - بەرێز بابەشێخی حسێنی سكرتێری گشتی سازمانی خەبات داوایەك پێشكەش بە نەتەوەیەكگرتووەكان دەكا


بەرێز بابەشێخی حسێنی سكرتێری گشتی سازمانی خەبات داوایەك پێشكەش بە نەتەوەیەكگرتووەكان دەكا
تاریخ : Saturday, June 24 @ 10:03:09 UTC
بابه‌ت : به‌ڵگه‌نامه‌کان


خەباتمێدیا: بەبۆنەی گرتن و راوەدوونانی چالاكانی سیاسی و مەزهەبی ئەم دواییەی هێزە سەركوتگەرەكانی رژێمی ئاخوندی ئێران لە كوردستان، بەرێز بابەشێخی حسێنی سكرتێری گشتی سازمانی خەباتی كوردستانی ئێران داوایەك پێشكەش بە ئانتۆنیۆ گوترس سكرتێری گشتی نەتەوە یەكگرتووەكان دەكات. لە داواكەیدا سكرتێری سازمانی خەبات ئیشارە بە رووداوە گوماناویەكانی شارى تاران و 


پارچەكرداری هێرشە سەركوتگەرەكانی رژێم لە شارەكانی كوردستان و گرتن و شكەنجە و زیندانی كردنی ژمارەیەك لە چالاكانی سیاسی و مەزهەبی دەكات و داوا لە سكرتێری نەتەوە یەكگرتووەكان و ناوەندەكانی پارێزەری مافی مرۆڤ دەكا كە بەر بەو هەوڵە تاوانكاریانەی رژێم لە كوردستان و شارەكانی دیكەی ئێران بەر بگرن.
دەقی پەیامەكەی كاك بابەشێخی حسێنی بۆ ئانتۆنیو گوترس:

بەرێز  جەنابی ئانتۆنیۆ گۆترس سكرتێری گشتی رێكخراوی نەتەوە یەكگرتوەكان

بە ئاگاداری بەرێزتان دەگەێنم كە دەسەڵاتدارانی رژیمی ئێران رووداوەکانی رۆژی چوارشەممە ١٧ی جۆزەردانی ١٣٩٦ی هەتاوی بەرانبەر بە ٧ی ژوئەنی ٢٠١٧ی زایینی تاران و تەقەکردن لە قەبری خومەینی و مەجلیسی شورای ئیسلامی یان كردۆتە بیانوو  و هەلێک بۆ ئەوەی  چالاكانی سیاسی و بە تایبەت خاوەن باوەرانی سوننی مەزهەب لە ئێران و كوردستان بخاتە ژێر فشارو زیندانیان بكات.
لە دوای هێرشی چەكداریی جێگەی گومان لە رۆژی 7 ی ژوئەن لە تاران ، دەسەڵاتدران و بە تایبەتی ناوەندە ئەمنیەتیەكانی حكومەت زیاتر لە 40 كەسیان لە شارەكانی پیرانشار، سەردەشت، ورمێ،‌ بۆكان، تیكاب، مەهاباد، سەقز، روانسەر و پاوە لە كوردستانی ئێران گرتووەو خستویانە ژێر شكەنجەی قورس. 
ئاشكرایە گرتنی ئەو كەسانە تەنیا بە ئامانجی سەركوت و چاوترساندنی خەڵكەو هەروەها خانەوادەو كەس و كاری گیراوەكان ڕایگەیاندووە كە ئەوان هیچ جۆرە پێوەندێكیان بە داعش و هیچ دەستەیێكی ترۆریستیەوە نیە.
ئێمە لە سازمانی خەبات ی كوردستانی ئێران داوا لە بەرێزتان و تێكرای ناوەندە مرۆڤ دۆستەكان دەكەین هەوڵی بە پەلەو جیددی بدەن بۆ ئەوەی رێگە بگرن لە سەركوتی خەڵك و چالاكانی سیاسی لە كوردستان و شارەكانی دیكەی ئێران كە لە لایەن ئیدارە ئەمنیەتیەكانی حكومەت لە ئێراندا بەرێوەدەچن.
سازمانی خەبات ی كوردستانی ئێران
سكرتێری گشتی 
بابەشێخ حوسەینی






سه‌رچاوه‌ی ئه‌م بابه‌ته‌ : KHABAT media


لینکی ئه‌م بابه‌ته‌ :
/modules.php?name=News&file=article&sid=8847